All posts by karlakor800

Nýr geisladiskur

Elfur tímans framhlið

Karlakór Selfoss hefur í tilefni 50 ára afmælis síns gefið út sinn fjórða geisladisk sem ber nafnið Elfur tímans. Nafn disksins er sótt í Næturljóð Jóns frá Ljárskógum og vísar til þess að ekkert fær stöðvað tímann sem er líkt og fjót er streymir stöðugt áfram og safnar minningum um sigra og sorgir.

Á diskinum eru fjölbreytt kórverk sem eru mörg sérstaklega útsett fyrir kórinn, jafnt hefðbundin karlakóralög og nýleg lög.

Lögin eru sótt í rússneskan tónlistararf, miðevrópskan og sígildan Chopin, til Norðurlandanna, en að meirihluta til íslenskra tónskálda og textahöfunda. Á diskinum eru 13 lög sem kórinn hefur flest flutt á tónleikum sínum á undanförnum árum. Nokkur laganna eiga auðvitað sterk tengsl við sunnlenskan tónlistararf þar sem lag eða texti, eða bæði, eru eftir Sunnlendinga, svo sem lögin Sumarkvöld og Háfjöllin eftir Sigurð Ágústsson og Veraldarvísur Lofts S. Loftssonar þar sem tveir ungir kórfélagar, þeir Hermann Ingi Magnússon og Róbert Aron Pálmason syngja tvísöng. Þá er einnig seilst út fyrir hefðbundin karlakóralög. Þannig er lagið Söknuður sem þekkt er í flutningi Vilhjálms Vilhjálmssonar, hér í kórútsetningu, nýleg útsetning af laginu Þokufjöll sem er úr Hringadróttinssögu og ný útsetning af laginu Líttu sérhvert sólarlag en Bragi Valdimar Skúlason samdi bæði lag og texta.

Inn á diskinn sungu 62 félagar undir stjórn Lofts Erlingssonar við undirleik Jóns Bjarnasonar, upptökustjórn annaðist Sigurður Rúnar Jónsson.

Diskurinn kostar 2.500 kr. og er til sölu hjá kórmönnum, hjá Sólningu á Selfossi, Rakarastofu Björns & Kjartans, BYKO og Evítu og að sjálfsögðu á vortónleikaröð kórsins sem hófust á sumardaginn fyrsta, 23. apríl, í Selfosskirkju. Þeim verður síðan fylgt eftir með tónleikum í Selfosskirkju 28. apríl, í Fella- og Hólakirkju 30. apríl og með lokatónleikum á Flúðum laugardaginn 2. maí.

Share

50. vortónleikar Karlakórs Selfoss

korinn

Á sumardaginn fyrsta, 23. apríl, heldur Karlakór Selfoss sína fimmtugustu vortónleika í Selfosskirkju. Þeim verður síðan fylgt eftir með tónleikum í Selfosskirkju 28. apríl, í Fella- og Hólakirkju 30. apríl og með lokatónleikum á Flúðum laugardaginn 2. maí.

Kórinn hefur aldrei verið jafn fjölmennur og í vetur en 72 menn hafa stundað stífar en skemmtilegar æfingar. Kórinn nýtur leiðsagnar tveggja frábærra fagmanna sem gera miklar kröfur en veita líka góða leiðsögn og kennslu, þ.e. Lofts Erlingssonar, stjórnanda kórsins til 15 ára og Jóns Bjarnasonar undirleikara og er full ástæða til að þakka þeim frábært starf og samvinnu.

Á efnisskrá tónleikanna er 21 lag sem sum hafa fylgt kórnum frá upphafi, nokkur eru sígild karlakóralög með átakanlegum mildum köflum og síðan átakamiklum og kraftmiklum hápunktum. Þá flytur kórinn léttari lög í bland við nýútsett lög fyrir kórinn.

Til heiðurs heimabyggð okkar byrja tónleikarnir á fjórum lögum um héraðið okkar Árnesþing, förum um Þjórsá, frá Flóanum og upp í Háfjöllin. Þaðan tengjum við okkur með fjöllum yfir í kulda og söknuð, förum um Þokufjöll, Er haustið ýfir, um Dimma daga, skoðum Frostrósir og syngjum Söknuð til heiðurs Vilhjálmi Vilhjálmssyni sem hefði orðið sjötugur nú í apríl, en léttum andann og ljúkum fyrir hlé með því að „syngja burtu sorgir“ í Veraldarvísum, þar sem tveir kórfélagar syngja tvísöng. Eftir hlé syngjum við um sól, bjartar nætur og stúlkur en lokakaflinn eru svo heimspekilegar hugleiðingar, von um betra líf, óperukórarnir „Gullnu vængir“ og „Hermannakórinn“ hylling fósturjarðarinnar og forfeðranna með „Heill yður íslensku landnámsmenn“.

Veturinn hefur verið óvenju annasamur með jólaprógrammi, æfingum og upptökum á geisladiski og vaxandi tækifærissöng. Þá hélt kórinn glæsilega afmælishátíð 6. mars sl. í tilefni 50 ára afmælisins þar sem frumkvöðlunum var þakkað, sagan rifjuð upp, sungið og dansað.

Kórfélagar hafa lagt sig fram um að mæta vel til æfinga og söngs í allan vetur og hlakka til að flytja afrakstur vetrarstarfsins fyrir gesti sína, nú þegar vorið er á næsta leiti.

Share