Vetrarstarf Karlakórs Selfoss er að hefjast núna þegar haustar að, eftir frekar lítilfjörlegt sumar. Aðalfundur kórsins var haldinn 19. ágúst sl. og þar var kjörin stjórn en hana skipa: Unnar Steinn Guðmundsson formaður, Þórir Haraldsson gjaldkeri, Einar Hermundsson, Björgvin R. Snorrason, Jóhann Pétur Jóhannsson ritari og Jóhannes Hr. Símonarson.

Sumarið var ekkert til að hrópa húrra fyrir og til þess að bæta okkur það upp, mun kórinn leggja enn meiri metnað í vetrarstarfið, og þá sérstaklega vegna þess að 2. mars nk. eru 60 ár síðan Karlakór Selfoss var stofnaður.

Norrænn samhljómur fyrsta verkefni þessa starfsárs eru tónleikar í Skálholtskirkju sunnudaginn 13. október, þar sem við syngjum með einum virtasta karlakór Svíþjóðar, Karlakór Stokkhólms. Eru unnendur karlakórasöngs hvattir til að mæta í Skálholt þennan sunnudag.

Strax að afloknum tónleikunum með Karlakór Stokkhólms verður haldið kynningarkvöld, mánudaginn 14. október kl. 19:30, þar verður starfsemi komandi vetrar kynnt og nýir söngmenn boðnir velkomnir, og síðan hefjast reglubundnar æfingar vetrarins mánudagskvöldið 21. okt. kl. 19:30 í félagsheimili kórsins að Eyravegi 57.

60 ára afmæli Komandi starfsár er það 60. í sögu kórsins, stofnaður 1965.

Mörg spennandi og skemmtileg verkefni eru framundan og söngskrá vetrarins (bestu lögin í 60 ár) verður kynnt á fyrstu æfingunni, en æft verður einu sinni í viku, á mánudagskvöldum kl. 19:30-22:00.

Fastir punktar í vetrarstarfinu eru jólatónleikar sem haldnir verða í Selfosskirkju 17. desember og Skálholtskirkju 9. desember. Þá eru vortónleikar kórsins áformaðir í Selfosskirkju samkvæmt venju á sumardaginn fyrsta, 24. apríl 2025 og 29. Apríl. Svo verður sungið í Fella- og Hólakirkju fimmtudaginn 1. maí og lokatónleikar verða svo í Skálholtskirkju laugardaginn 3. maí 2025.

Ýmsar hugmyndir eru uppi um sérstaka viðburði vegna afmælisársins, sem verða kynntir síðar á starfsárinu

Um og yfir 60 söngmenn hafa starfað með kórnum undanfarin ár og stjórnandi Karlakórs Selfoss er eins og undanfarin tíu ár, Skarphéðinn Þór Hjartarson og píanóleikari er Jón Bjarnason, sem starfað hefur með kórnum í 15 ár.

Nýir félagar eru sérstaklega boðnir velkomnir og eldri söngmenn eru hvattir til að mæta. V

Karlakór Selfoss

Vortónleikar 2024

Það er 59 ára gömul hefð fyrir vortónleikum Karlakórs Selfoss á sumardaginn fyrsta. Og nú, þegar hillir undir lok á tiltölulega þægilegum vetri, boða kórfélagar til tónleika í Selfosskirkju að kvöldi sumardagsins fyrsta, þann 25. apríl, kl. 20:00. Á æfingum í vetur hafa um 60-70 félagar mætt á hverju mánudagskvöldi, og auðvita hefur kórinn komið fram við ýmis tækifæri. Má nefna að Karlakór Selfoss tók þátt í veglegum 40 ára stórtónleikum Lúðrasveitar Þorlákshafnar 13. apríl sl. og svo hefur kórinn sungið við ófáar jarðarfarir á liðnum vetri.

Snemma síðastliðið haust var kynnt fyrir kórfélögum metnaðarfull söngdagskrá sem tekur m.a. mið af fyrirhugaðri söngferð Karlakórs Selfoss til Salzburg í Austurríki í sumar. Meðal laga sem tengjast Austurríkisferðinni má nefna Dóná svo blá, Alparós og Vín, Vín, þú aðeins ein. Og meðal nýrra verka sem kórinn hefur æft í vetur er lagði Borgin við ána þar sem Valgeir Guðjónsson er höfundur bæði lags og texta. Auðvita eru svo einnig hefðbundin ramm-íslensk karlakórslög á dagskránni.

Þeir eru sem fyrr í fararbroddi Skarphéðinn Þór Hjartarson stjórnandi kórsins og Jón Bjarnason píanóleikari, en samstarfið við þá félaga hefur gengið vel undanfarin ár.

Sem fyrr segir verða tóleikar haldnir í Selfosskirkju á sumardaginn fyrsta og síðan verða tónleikar nr. 2 haldnir í Selfosskirkju þriðjudaginn 30. apríl kl. 20:00 og svo verður sungið í Fella- og Hólakirkju í Reykjavík fimmtudaginn 2. maí kl. 20:00. Lokatónleikar þetta vorið verða laugardaginn 4. maí í Skálholtsdómkirkju kl. 17:00. 

Aðgöngumiðaverð er kr. 4000.

Vortónleikar Karlakórs Selfoss 2023

Sumardagurinn fyrsti markar tímamót í hugum flestra Íslendinga. Þá er erfiður vetur að baki og framundan er vorið og sumarið. – Karlakór Selfoss hefur undanfarin 58 ár fagnað vorinu með tónleikum sem nú verða haldnir í Selfosskirkju að kvöldi fyrsta sumardags, þann 20. apríl kl. 20:00.

Kórfélagar hafa samviskusamlega æft í vetur vandaða söngdagskrá sem inniheldur fjölmörg ný verk, sem ekki hafa verið flutt af karlakórum fyrr, og efnisskráin er hæfilega blönduð af hefðbundnum karlakórslögum. Við nýju verkin njótum við þess að stjórnandi kórsins, Skarphéðinn Þór Hjartarson, er flínkur útsetjari og er um helmingur laganna útsettur fyrir kórinn af honum. Skarphéðinn hefur starfað með Karlakór Selfoss í 8 ár. Píanóleikari kórsins, Jón Bjarnason, hefur starfað með Karlakór Selfoss í 12 ár.

Í upphafi starfsárs bættist karlakórnum góður liðsauki, því fjölmargir söngglaðir menn gengu í kórinn og hafa staðið sig vel á æfingum í vetur. Trúlega hefur Karlakór Selfoss ekki verið fjölmennari en nú. Má nefna að við myndatöku í vor mættu 52 félagar en 20 piltar voru fjarverandi.
Ef gluggað er í söngskrá tónleikanna er þar t.d. að finna nokkur lög (5) þeirra bræðra Jónasar og Jóns Múla Árnasona og nefna má lagið Biskupstungur eftir Bjarna Sigurðsson frá Geysi við texta Helga Seljan. Einnig má nefna lagið Hvert örstutt spor við texta Halldórs Laxness og Afmælisdiktur Þórbergs Þórðarsonar, en of langt mál yrði að gera söngskránni allri skil (22) í þessari stuttu grein.

Sem fyrr segir verða fyrstu tóleikarnir haldnir í Selfosskirkju á sumardaginn fyrsta og síðan verða tónleikar nr. 2 haldnir í Selfosskirkju þriðjudaginn 25. apríl kl. 20:00. Þá verða tónleikar í Reykjavík haldnir í Fella- og Hólakirkju fimmtudaginn 27. apríl kl. 20:00 og lokatónleikar starfsársins verða laugardaginn 29. apríl í Skálholtsdómkirkju kl. 17:00. – Aðgöngumiðaverð er kr. 4000.

Vegna Covid-19 hefur allt starf Karlakór farið úr skorðum og verðum við því miður að fresta tónleikum okkar í vor fram á haustið en ákveðið hefur verið að tónleikar verði í Selfosskirkju 28.10 og 30.10 og í Skálholtsdómkirkju 31.10.

Mánudagskvöldið 16. Desember kl.20 verður hin árlega Jólastund Karlakórs Selfoss. Einsöngvari með kórnum er Alda Ingibergsdóttir
Enginn aðgangseyrir, en tekið er á móti frjálsum framlögum sem renna til líknarmála.

Jólastund Karlakórs Selfoss framundan

Á aðventunni er ágætt að setjast niður, gleðja og efla andann og njóta lífsins í góðu umhverfi. Ekki er verra við slík tækifæri að hlýða á fallega jólatónlist í flutningi Karlakórs Selfoss. Eitt er víst að alltaf verður ákaflega gaman þá.

Jólastund Karlakórs Selfoss verður í Skálholtsdómkirkju mánudagskvöldið 9. desember nk. og hefst kl. 20:30, en hin síðari er í Selfosskirkju viku síðar, 16. desember og hefst kl. 20.

Á efnisskrá fá allir eitthvað fallegt, jólalög úr ýmsum áttum í bæði þekktum og nýjum útsetningum. 

Alda Ingibergsdóttir syngur einsöngslög með kórnum, stjórnandi er Skarphéðinn Þór Hjartarson og undirleikur er í höndum Jóns Bjarnasonar. 

Aðgangur er ókeypis, en tekið er á móti framlögum til líknarmála.